شهدت محافظة المنوفية واقعة مأساوية، بعدما تعرضت فتاة عشرينية لمحاولة تعدٍّ وحشية من 4 شباب بينهم سائق “توك توك”، حاولوا سرقتها والاعتداء عليها بالإكراه، ما أسفر عن إصابتها بإصابات بالغة وكادت أن تفقد حياتها.
فرحها الشهر المقبل.. والد فتاة بالمنوفية يتهم سائق توك توك و3 آخرين بالتعدي عليها وسرقتها: عاوز حقها | بث مباشر
وروى والد الضحية ويدعى أشرف سعيد عبدالحفيظ حمد، تفاصيل الحادث قائلاً: بنتي كانت خارجة من شغلها ومعاها فلوسها وتليفونها.. وهي راجعة من شغلها في المصنع، ركبت توك توك، والسواق سمعها بتتكلم في التليفون مع زميلتها وبتقول إنها مع فلوسها عشان تصفي حسابها قبل جوازها الشهر الجاي وبيت النية عليها واستناها.
وأضاف قائلا: بعد ما خلصت شغلها ومشت في طريقها، استناها ومعاه 3 شباب آخرين.. وبنتي ما تعرفش إن نهايتها كانت جاية.. وركبوا جنبها،خطفوها، وطلعوا بيها مكان نائي وسط الأراضي الزراعية بعيد عن الناس وكتموا نفسها وضربوها ضرب موت، وكانوا بيتكلموا مع بعض بأسمائهم، فلما عرفت هددوها بالقتل عشان ما تفضحهمش.. وكانوا مجهزين طوبة وحبل علشان يقتلوها ويرموها في المصرف عشان حتى ما نعرفش ندفنها.
وأشار إلى أن أحد الأشخاص كان يقود تروسيكل شاهدهم وقرر أن يساعدها، مضيفا: الراجل أول ما شافهم خاف يقرب، جري للفلاحين في الغيط وقالهم فيه ست بيموتوها.. والفلاحين طلعوا عليهم بالفؤوس وأنقذوا بنتي.. لكن بنتي وهي عايشة مش عايشة.
وأشاد الأب بسرعة استجابة الأجهزة الأمنية بمديرية أمة المنوفية والتي ألقت القبض على المتهمين الأربعة بسرعة كبيرة، قائلا: المباحث وصلت بسرعة نتيجة بلاغ الأهالي، وخلال أقل من ساعة كانوا جايبين الأربعة الناس دي عملوا مجهود عظيم وجابوا المتهمين بسرعة.”
وعن حالة ابنته الصحية قال الأب: بنتي دلوقتي في المستشفى، موجودة بجسدها لكن روحها ماتت.. عندها كسر وضعف في الفك السفلي من الضرب بالشومة، وطعنة في الفخذ، وطعنة تحت الذقن كانت رايحة للرقبة وجسمها كله مسحول.. لو راجل في عز قوته ما يستحملش اللي شافته.
وأكد أن ابنته كانت تستعد للزواج الشهر القادم، قائلا: كانت خلاص ناوية تسيب الشغل وتجهز للجواز، لكن نصيبها ركبت التوك توك ده.. وعرضوا عليّ فلوس عشان أتنازل، لكن فلوس الدنيا كلها ما تعوضش بنتي.. وكل اللي أنا عايزه عدل ربنا وأنا مش طالب غير حقها
