شهدت منطقة عين شمس بمحافظة القاهرة واقعة صادمة، بعدما اتهمت سيدة زوجها بالتعدي على ابنتها القاصر والتحرش بها داخل المنزل أثناء غيابها، مؤكدة أنه خان الأمانة التي وضعتها فيه طوال سنوات زواجها.
التحرش طفلة على يد زوج والدتها
الأم روت تفاصيل الواقعة الأليمة، قائلة: أنا كنت منفصلة عن زوجي الأول، ومعايا طفلين صغيرين وقتها ما كملوش 6 سنين، وماحدش من أهلي استحملني بسبب ضغوط الحياة.. واخترت إني أتجوز جارنا في 2016، وهو أكبر مني بحوالي 20 سنة، وكنت فاكرة إنه هيكون السند ليا ولولادي.. وكان بيشتغل إمام مسجد وخطيب.. وأنا صدقته وحطيت فيه ثقة عمياء، وكنت بسيب بناتي معاه وأنا بشتغل عشان أقدر أصرف عليهم.
وأضافت الأم: عشنا مع بعض حوالي 9 سنين، وفي البداية كان بيساعدني وبيصرف على البيت، لكن مع الوقت المشاكل كترت وكان دايمًا بيعاتبني.. ومع كل ده عمري ما شكيت فيه وكنت بعتبره زي الجد لبناتي وعمري ما تخيلت إنه يبص لهم.
وتابعت الأم: الأسبوع اللي فات خدت دواء للنوم بسبب مشاكل في الفقرات، وصحيت الساعة 3 الفجر على صوت موبايلات.. وخرجت لقيت منظر بشع، لقيته بيتحرش ببنتي الكبيرة، وإيده في مكان حساس وهي خايفة وبتتحرك.. و صرخت وهو جري حبَسني في أوضة وقفل عليّ المفتاح عشان الجيران ما يسمعوش.. وبعدين قعد ينكر ويقول إني كذابة، ولما واجهته قال لي اعتبريها غلطة والشيطان جرى في عروقي.
واستكلمت الأم وهي تبكي: لما واجهت بنتي قالت لي إن الموضوع مش أول مرة، وإنه بيتحرش بيها من سنة أو أكتر وأنا مش موجودة في الشقة.. وقالت لي إنه كان يستغل غيابي وأنا في المستشفى أو في شغلي ويقرب منها.. وحتى لما كنت في المطبخ كان يقرب منها وأنا اتصدمت، ده اللي كنت معتبرة إنه الأب المثل لبناتي طلع بيستغلهم.
وأوضحت: من يوم ما اكتشفت اللي حصل وهو بيهددني.. ومرة يقولي هقطع الأكل عنك وعن عيالك، ومرة يقولي هبعت لك بلطجية يأذوكي.. وكمان بيتهمني في في شرفي بكلام بشع على الواتساب.. وأنا وأولادي عايشين في رعب، وهو مش بس خان الأمانة، ده كمان بيهددنا ويشوّه سمعتي.
واختتمت الأم حديثها قائلة: أنا عايزة حقي وحق بنتي، مش هسيب حقي.. واتخدعت في مظهره، وفي الآخر خان الثقة وضيع براءة بنتي.. وأنا بستغيث بالمسؤولين وبقول يا ناس أنقذوني من التهديد وأجيب حقي.
