شهدت منطقة شبرا الخيمة بمحافظة القليوبية واقعة مؤلمة، بعدما لقي الطالب كريم، البالغ من العمر 17 عامًا، مصرعه بطلق ناري أطلقه عليه صديقه، بسبب خلاف مالي بينهما.
مقتل طالب على يد زميله في شبرا
والد الضحية روى تفاصيل ما جرى، قائلا: جالي تليفون وأنا في الشغل قالوا لي الحق ابنك اتضرب بالنار.. وجريت على مستشفى ناصر لقيته داخل ميت.. واللي قتله اسمه محمد حمادة، وكان لسه متعرف عليه في نفس اليوم عن طريق واحد صاحبه وهو اللي استدرجه علشان المتهم يقتله.
وأعرب والد الضحية، عن حزنه الشديد لوفاة نجله بهذه الطريقة، مؤكدا أنه كان معروفا بأخلاقه بين زملائه وأهالي المنطقة التي يعيشون فيها ولم يتسبب في أي مشكلات، قائلا: كريم ابني الكبير وضهري وسندي، كل حاجة بالنسبالي. كان صاحبي وأخويا وابني، وكان بيقول لي على كل حاجة، والدنيا كلها كانت بتحبه وما كانش بيعمل مشاكل مع حد.. وجنازته كانت زفة عريس والشارع كله اتملى بالناس، وصوره متعلقة في كل مكان. كان عنده عيد ميلاده يوم 1 أكتوبر، ومات قبل عيد ميلاده بثلاثة أيام.
من جانبها، قالت والدة كريم المجني عليه: أنا كنت حاسة من الصبح بقلبي مقبوض.. وقلت له ما تخرجش ورد عليا إنه هيخرج مع صحابه.. وبعدها قال لي أنا بحبك يا ماما وباسني ومشي.
وأضافت الأم: بعد شوية سمعت الطلقات وقلبي انقبض.. وابني كان عريس، محبوب من الكل، مناشدة من الجهات المعنية بالحصول على حقه، قائلة: أنا عايزة حق ابني.. وأنا لا بأكل ولا بنام من يوم الحادث.. وحقه لازم يرجع.
