علقت شروق وفا لاعبة منتخب مصر للشطرنج، على قرار مجلس إدارة الاتحاد المصري بإيقافها وتحويلها للتحقيق، وذلك بسبب تصريحاتها الأخيرة وهجومها على الاتحاد، في منشور نشرته عبر حسابها على موقع التواصل الاجتماعي فيس بوك.
أول تعليق لـ شروق وفا على قرار اتحاد الشطرنج بإيقافها وتحويلها للتحقيق
وقالت اللاعبة شروق وفا: القصة بدأت من السنادي لما جه اتحاد كتير وحصل كذا مشكلة زي اللي ذكرتهم في البوست، مكنش فيه دعم للبطولات اللي بتطلع تبع المتهم، ولحد الآن كل البطولات أنا طلعتها على حسابي، ولما كنا بنتكلم معاهم مكنش فيه حاجة بتتغير.
وأضافت: الموضوع بدأ يتراكم بعد الأحداث دي وأنا خدت قرار إني ألعب باسم أيرلندا، وتصحيح للناس هو مش تجنيس، لأني ممكن أقدم على جنسية دولة تانية بحكم إني عايشة فيها بس أفضل أمثل مصر في الشطرنج، وممكن بردوا ميبقاش معايا جنسية الدولة التانية وألعب باسمها عشان عندي الإقامة فيها.
واستكملت اللاعبة شروق وفا: حاولوا معايا كتير في أيرلندا على مدار الـ 5 سنين اللي فاتت عشان ألعب معاهم، ولكن كانت الفكرة مرفوضة تمامًا بالنسبالي، وبعد المواقف اللي حصلت مع الاتحاد خدت قرار إني ألعب باسم أيرلندا.
وتابعت: أنا على طول بشارك في بطولات مش بتزود لي حاجة غير إنها بتساهم في نتيجة المنتخب زي الأولمبياد، الشطرنج بالنسبالي شيء جانبي ومش بعتمد عليه كشغل لأن عندي وظيفتي في أيرلندا، ولكن أنا بحب اللعبة وصعب بعد كل اللي حققته أسيب المجال، ولأننا متصدرين البطولات الإفريقية والعربية من زمان فصعب أشوفها بتضيع مننا لدول تانية.
واختتمت اللاعبة شروق وفا: أنا خدت قرار إني مش هلعب مع المنتخب تاني، واللي خلاني أعلن عن الموضوع دلوقتي إن الاتحاد نزل مقال بيبرر فيه قصة تانية لعدم اختيار أخويا للمنتخب عشان مستواه ضعيف، اللي هو نفس الكلام اللي بيتقال عليا، دي كانت القشة التي قصمت ظهر البعير وأسلوب التعامل مع لاعبي المنتخب مبقاش أحسن حاجة، ومهما حصل أنا هفضل مصرية ومكنتش حابة فكرة إني ألعب باسم منتخب تاني، خصوصًا إن الموضوع كان قدامي من سنين وكنت رفضاه، وأتمنى إن الوضع يتحسن ونحاول نعالح المشكلة من أساسها.
